नेकपा मालेले पाँच सभासद् छान्यो

 >महासचिव मैनाली पनि सभासद सूचीमा  
काठमाडौ, पुस ११ - नेकपा(माले)ले आफ्नो पार्टीबाट संविधानसभामा पठाउने समानुपातिक तर्फको सभासदहरु चयन गरेको छ । पार्टी पोलिटब्यूरो बैठकले समानुपातिक तर्फ पाएको ५ सिटका लागि महासचिव चन्द्रप्रकाश(सीपी) मैनाली सहितको नाम तय गरेको हो   । मालेले समानुपातिक तर्फ १ लाख ३० हजार ३ सय मत पाएको थियो । पार्टीले निर्वाचनमा आयोगमा बुझाएको बन्द सूचीबाट मैनाली सहित पार्टी केन्द्रीय सदस्यहरु अइन्द्रसुन्दर नेम्वाङ्, शिवचन्द्र चौधरी, कलशा महरा र कमला विकलाई निर्वाचित सभासदका रुपमा छानिएको उक्त पार्टीले जारी गरेको विज्ञप्तीमा जनाइएको छ । उनीहरुको नाम निर्धारित समय भित्रै निर्वाचनमा आयोगमा बुझाइने महासचिव मैनालीद्वारा जारी विज्ञप्तीमा उल्लेख छ ।
नेकपा मालेले मन्त्रिपरिषद्को निर्णयका आधारमा राष्ट्रपतिको आह्वानमा संविधानसभाको बैठक बोलाइनुपर्ने भनेको छ । उसले संविधान निर्माणपछि मात्र राष्ट्रपति र उपराष्ट्रपतिको निर्वाचनको व्यवस्था मिलाउन तथा कांग्रेस र एमालेले अधिकतम सहमतिको सरकार गठन गर्नुपर्ने पार्टीको धारणा सार्वजनिक समेत गरेको छ ।